Lome, 27 nëntor - Gjashtë futbollistë të një prej skuadrave elitare të futbollit në Togo mbetën të vrarë, pasi autobuzi me të cilin udhëtonin doli jashtë rruge, u rrotullua rreth vetes dhe mori flakë, bënë të ditur \"BBC World\".

Aksidenti ndodhi rreth 150 kilometra në veri të kryeqytetit Lome, pranë qytetit të Atakpames.

Skuadra e Etual Filantes ishte duke udhëtuar për të zhvilluar një ndeshje kampionati. 13 futbollistë dhe antarë të tjerë të stafit mbetën të plagosur, disa prej të cilëve në gjendje të rëndë.

Sipas të mbijetuarve, gjithçka ndodhi kur një gomë e mjetit shpërtheu papritur, duke shkaktuar humbjen e kontrollit të autobuzit prej drejtuesit të tij.

“Nuk e dimë ende se si mundëm të mbijetonim. U krijua një zjarr i frikshëm”, deklaroi portieri Mama Souleyman.