Lazio, 15 shkurt - Drejtori sportiv i Lazios, Igli Tare ka insistuar se Serie A është ende liga më e mirë e futbollit në Evropë.

Ish reprezentuesi shqiptar, ka kundërshtuar mendimin e shumëkujt se Kampionati italian ka humbur vlerën e tij me largimin e shumë prej yjeve të mëdhenj në vitet e fundit dhe pjesëmarrjen e vetëm tri skuadrave në Ligën e Kampionëve.

Ish sulmuesi i skuadrës Biancocelesti, tani në rol zyrtar, beson se Serie A vazhdon të jetë liga më e mirë në Evropë.

“Ju siguroj se duke shikuar ndeshje anembanë Evropës, Kampionati italian është ende më i miri”, deklaroi Tare për magazinën sportive gjermane Kicker. Tare po ashtu ka theksuar se Lazio është shndërruar në skuadrës të fuqishme në Itali.

“Ne tashmë disa sezone jemi duke shënuar sukses. Në ligë jemi duke u përmirësuar vit pas viti. Dhe, në sytë e mi e shoh se Lazios është duke u përmirësuar vazhdimisht”, deklaroi Tare i cili në vitet e fundit ka arritur të sjellë disa futbollistë kualitativë në Olimpico si Hernanes e Klose, që janë shndërruar në figura kyçe të ekipit.