Lazio, 28 janar - Me arritjen e Stefano Sorrentinos në Palermo, Samir Ujkani është vendosur në shitje nga klubi sicilian.

Portieri shqiptar në fakt ka disa opsione, ku mund ta vazhdojë karrierën, ose të paktën vazhdimin e këtij sezoni.

Siç raporton e përditshmja italiane Tuttosport, për ish portierin e Anderlechtit dhe Novarës interesim serioz ka shfaqur Lazio, e cila është në kërkim të një alternative valide në rast se largohet njëri prej lojtarëve, Bizzarri apo Carrizzo, me destinacion Chievon.

Edhe Fiorentina mund ta bëjë një tentativë për përfaqësuesin shqiptar, në rast se e shet Emiliano Vivianon. Sidoqoftë, Ujkani duket se nuk hyn më në planet e ekipit sicilian, kështu që shitja, shkëmbimi apo huazimi i tij është i pashmangshëm në tri ditët e fundit të afatit kalimtar të janarit.