Madrid, 16 maj - Në një intervistë të publikuar në faqen e klubit në internet dhe në televizionin zyrtar të Realit të Madridit, Cristiano Ronaldo kërkon mbështetjen e tifozëve për finalen e Kupës së Mbretit.

“Do të hyjmë në fushën e lojës të fortë dhe me bindjen për të fituar. Këto janë detajet që e bëjnë këtë klub më të mirin e botës. Edhe pse “Santiago Bernabeu” do të ndahet 50 % nga tifozët tanë dhe 50 % nga ata të Atleticos, kjo nuk do të na i ulë ambiciet për ta fituar këtë trofe."

"Ky është një eveniment që na bën entuziastë dhe të gjithë duam që të arrijmë një sukses të rëndësishëm. Do të jetë një finale e çuditshme sepse luajmë në stadiumin tonë por nuk mbështetemi nga pjesa më e madhe e tifozëve”.

Në vijim, portugezi zbulon sekretin e përgatitjes së tij përpara ndeshjeve.

“Në kokën time, e përgatis çdo ndeshje në të njëjtën mënyrë, por kjo është një finale dhe gjërat ndryshojnë disi. Bëhet fjalë për një takim të veçantë, por ambicia ime kryesore është e njëjtë: të ndihmoj Realin e Madridit me gola dhe asiste”.