Paris, 16 maj - Paris Saint Germain (PSG) po përgatit një ofertë prej 100 milionë eurosh për Cristiano Ronaldo, të cilin do përpiqet ta blejë nga Real Madrid në merkaton e verës.

Sipas ‘L’Equipe’, sheiku Al Khelaifi do t’i ofrojë plot 18 milionë euro në sezon sulmuesit portugez, ndërsa arkat e klubit madrilen do të mbushen me 100 milionë euro. Klubi francez gjithashtu do të ishte i gatshëm të linte të lirë trajnerin Carlo Ancelotti (kërkohet pikërisht nga “merengues”) vetëm nëse Reali do të negocionte për Cristianon.

Presidenti i gjigandëve spanjollë, Florentino Perez, nuk do që të shesë yllin e ekipit, por problemi qëndron se Cristiano nuk dëshiron të rinovojë kontratën që i skadon në vitin 2015.

Aktualisht CR7 ka një pagë prej 10.5 milionë eurosh në sezon, pagë që do të shkojë në 18 milionë euro nëse transferohet në kryeqytetin francez.