Torino, 9 korrik - Forlan, Lucio, Julio Cesar, Maicon e Pazzini, kompania e vjetër e Interit po largohet por për këtë të fundit planifikohet një tjetër lëvizje që ndoshta nuk do t’i pëlqejë tifozëve zikaltër, Juventusi.

Pazzini deklaroi hapur se nuk bën më pjesë në projektin e skuadrës së Stramaccionit dhe tani ofertat për të mund të vijnë nga çdo skuadër, përfshirë edhe ato rivale.

\"Nuk bëj pjesë në projektin e skuadrës, shoqëria ka bërë një zgjedhje. Kam qenë gjithmonë i sinqertë dhe dua të jem edhe në këtë rast”, deklaroi mes skenës ku ishte grumbulluar skuadra e në prani të dhjetëra tifozëve që nuk ishin dakord me të.

Giampaolo Pazzini foli hapur, e menjëherë pas këtyre deklaratave, “Tuttosport”, që është shumë pranë klubit bardhezi raporton se Juventusit i intereson sulmuesi.

Tashmë asgjë nuk është e pamundur me rrugën Milano-Torino që u hap nga Lucio, por oferta e Juves pritet të jetë 8 mln Euro, shumë pak nga 15 mln që kërkon minimalisht Interi.

Për Pazzinin, Juventusi nuk është alternativa e vetme sepse sulmuesi kërkohet edhe nga Sampdoria e Fiorentina, dy ish klubet e tij të mëparshme.