Prishtinë, 20 qershor - Misioni i OSBE-së në Kosovë do të organizojë një turne dhjetëditor basketbolli për juniorë, nga 20 deri 30 qershor 2016, në Parkun e Gërmisë në Prishtinë.

Për këtë ngjarje do të mblidhen rreth 100 djem e vajza nga komunitete të ndryshme që janë juniorë të klubeve të basketbollit nga Prishtina, Mitrovica Jugore, Gjakova, Prizreni dhe Shtërpca. Aktiviteti ka për qëllim fuqizimin e rinisë përmes sportit dhe vetëdijesimin e tyre për çështjet me të cilat përballen të rinjtë në Kosovë.

Pjesëmarrësit do të ndahen në dy grupe. Në grupin e parë do të jenë grupmoshat 14 dhe 15 vjeçe të cilët do t’i ushtrojnë teknikat e basketbollit nga 20 deri 24 qershori, ndërsa në grupin e dytë do të jenë grupmoshat 12 dhe 13 vjeçe të cilët do të ushtrojnë nga 25 deri 29 qershori. Trajnimi do të organizohet nën mbikëqyrjen e trajnerëve të akredituar nga Prishtina dhe Beogradi.

Krahas trajnimit të basketbollit, programi përfshin punëtori tematike për rininë, me fokus në promovimin e dialogut, tolerancës dhe mirëkuptimit reciprok.

Këto aktivitete edukative do të organizohen nga ekspertë të Misionit të OSBE-së në Kosovë; Departamenti i Rinisë i Ministrisë së Kulturës, Rinisë dhe Sportit; organizata Play International; dhe Innovations Lab e UNICEF-it. Theksi i temave do të jetë në qytetarinë aktive, pjesëmarrjen publike përmes sportit, të drejtat e të rinjve, ndërgjegjësimin fetar, kulturor dhe gjuhësor, njohuritë e botës së mediave dhe parandalimin e ekstremizmit të dhunshëm dhe radikalizmit.

Lojërat gjysmëfinale dhe finale do të mbahen në Amfiteatrin e Pishinës së Gërmisë në mbrëmjen e 24 qershorit grupi i parë dhe 29 qershorit grupi i dytë duke filluar nga ora 19:30.

Kjo ngjarje mbështetet nga Komuna e Prishtinës dhe Ambasada e Shteteve të Bashkuara të Amerikës, UNMIK-u, Kompania Rugovë, Alfracom International, dhe Management Development Associates (MDA).