Rio De Zhenerio, 28 korrik - Santos ka paralajmëruar skuadrën e Real Madridit se nuk do të mund ta transferojë lirë sulmuesin brazilian të Santosit Neymar, duke theksuar se ai vlen më tepër se 45 milion euro.

19-vjeçari Neymar, i cili spekulohej edhe me kalim te Chelsea, në kontratën e tij me Santosin ka dëmshpërblim prej 45 milion eurosh.

Por, drejtori sportiv i klubit brazilian, Pedro Luiz Nunes Conceicao, theksoi se Santosi nuk dëshiron të negociojë dhe theksoi se Reali deshi të transferojë Neymarin për një vlerë më të vogël.

\"45 milionë euro janë pak për Neymarin, ai vlen më tepër\", tha Conceicao për të përditshmen sportive spanjolle Marca.

Trajneri i Real Madridit, Jose Mourinho, kërkon Neymarin si përforcim në repartin sulmues për fillimin e sezonit të ri, por pengesë paraqet dëshira e lojtarit për t′u paraqitur në Kampionatin botëror të klubeve në dhjetor me Santosin.