Manchester, 17 tetor - Luis Nani është lodhur duke qëndruar në stolin e Manchester United, ndaj po thur planin e arratisjes nga Old Trafford, por mbi të gjitha është në kërkim të një skuadre, e cila të ketë besim tek aftësitë e tij teknike.

Me sa duket, Milani është vendi më i mirë për të. Pavarësisht largimit të shumë yjeve nga kampionati italian, mesfushori 25-vjeçar do të ishte më se i lumtur të transferohej në Serinë A.

Edhe menaxheri i tij, Jorge Mendes, po shikon përqark në kërkim të një klubi, ku me sa duket ka individualizuar Milanin si ekipin e duhur për futbollistin e asistuar prej tij.

Manchester Junajtid e ka blerë futbollistin portugez në vitin 2007 nga Sportingu për shumën e 20 milionë eurove.

Por, duke parë që portugezi ngroh stolin, vështirë se anglezët do të kërkonin të njëjtën shumë që shpenzuan para pesë vitesh.

 Nani ka pasur probleme të ndryshme edhe me shokët e skuadrës, e kërkon që të largohet nga Mançesteri sepse drejtuesit anglezë nuk ia rritën rrogën.

Pra, me pak fjalë, portugezi po bën të pamundurën për të bindur Sir Alex Ferguson ta largojë nga ekipi.

Nga ana tjetër, Nani ka të gjitha karakteristikat teknike që i pëlqejnë Alegrit dhe jo vetëm. Kështu që, sipas të gjitha gjasave, në janar portugezi ka shumë shanse t’i bashkëngjitet kuqezinjëve.