Madrid, 26 janar - Tekniku i Realit të Madridit, Jose Mourinho, ka pohuar se rikthimi i Kaka-së te Milani do t’i bënte mirë mesfushorit brazilian.

Për Kaka-në u fol gjatë në javët e fundit për një transferim tek Milan, por ishte Berlusconi ai që përgënjeshtroi gjithçka.

Pavarësisht kësaj, “Special One” i qëndron idesë së tij se 30 vjeçari do të ishte mjaft i lumtur në ish-skuadrën e tij.

“Më shumë se asgjë dua që Kaka të jetë i lumtur dhe për këtë ka vetëm një mënyrë, transferimi tek Milani. Mendoj se do të ishte një zgjedhje mjaft e mirë për të, por gjithsesi ai mbetet sërish një lojtar i Realit të Madridit,” tha Mourinho.

Tekniku portugez nuk përjashtoi as mundësinë që në një të ardhme jo shumë të largët të rikthehej tek zikaltërit e Interit.