Milano, 3 maj - Quhet Rafael Cabral Barbosa, shkurtimisht Rafael, dhe është një prej emrave që përfliten për të qënë portier i ardhshëm i Milan.

Sezonin e shkuar, me Santosin, ai fitoi Kupën Libetadores dhe përveç talenteve Neymar, Danilo apo Ganso ka qënë një prej pikave kyçe të sukseseve të klubit brazilian.

Portieri që më 20 maj mbush 22 vjeç është në radarin e drejtuesve kuqezinjë të cilët kanë nisur tratativat me klubin e Santos për të sjellë në Itali Rafael. Ky lajm konfirmohet edhe nga agjenti i lojtarit për Italinë, Dario Paolillo.

Një prej mënyrave për të sjellë atë që quhet pasardhësi i Julio Cesar në kombëtarene Brazilit është edhe kalimi i Robinho te Santos.

Gjithsesi pritet fillimi i merkatos së verës për të mësuar nëse sezonin tjetër Rafael do të jetë ose jo gardiani i portës së Milan.