Manchester, 15 tetor - Drejtori i Manchester Cityt, Brian Marwood ka theksuar se sulmuesi Mario Balotelli nuk paraqet shembull të mirë, siç kërkohet nga një futbollist, anëtar i skuadrës kampion të Premierligës.

Balotelli ka qenë i përfshirë në një numër të madh incidentesh në fushë dhe jashtë saj, pas transferimit te City nga Inter më 2010. Italiani mes tjerash është rrahur me bashkëlojtarë, ngacmoi futbollistët juniorë të Cityt dhe aksidentalisht ia vuri zjarrin tualetit të tij me një fishekzjarrë.

I pyetur se çfarë shembulli jep 22 vjeçari Balotelli, Marwood deklaroi: “Mendoj se është me rëndësi të jep shembull të mirë. Mendoj se ne të gjithë e dimë se për kë bëhet fjalë. Ka të atillë që nuk shfaqin vlera të drejta dhe sjellje të duhur”.

Ai shtoi: “Në këtë drejtim, ne kemi një grup fantastik të futbollistëve. Shikoj Pablo Zabaletan, Vincent Kompanyn, Joe Hart, Gareth Barry, Joleon Lescottin. Kemi shumë futbollistë që mendojnë dhe sillen në mënyrën e duhur. Ju mund ti merrni ata si shembuj”.