Tryumen, 25 maj - Xhudistja kosovare, Majlinda Kelmendi, ka vazhduar me paraqitje mahnitëse. Ajo, të shtunën, në Tryumen të Rusisë, ka fituar medaljen e artë në turneun ‘World Masters’, vetëm pak javë pasi fitoi medaljen e bronztë në Kampionatin evropian.

Majlinda në finalen e kategorisë 52 kilogramë e ka mposhtur xhudisten nga Mongolia, Tsolmon Adijasambu. Paraprakisht xhudistja kosovare në rrethin e parë kaloi pa luftë, në rrethin e dytë e mposhti spanjollen, Laura Gomez, kurse në gjysmëfinale u përball me sukses me rumunen, Andrea Çitu.

Kësisoj, Majlinda, ka bërë që të valvitet flamuri i Kosovës dhe të intonohet himni pikërisht në Rusi, shtet i cili vazhdimisht e ka kundërshtuar Pavarësinë e Kosovës dhe që ende nuk e njeh shtetësinë e saj.

Mirëpo, ky sukses i Majlindës ka bërë që himnin e Kosovës ta respektojnë edhe rusët, të cilët kanë qëndruar në këmbë gjatë intonimit të tij, derisa për Majlindën kanë shfaqur interesim të madh edhe mediat ruse.