Pejë 3 mars - Në aktivitetet e përkrahura nga Albaqeramika për rritjen e vetëdijës për rëndësinë e sportit të femijët, të mërkurën kampionia e botës në xhudo Majlinda Kelmendi ka vizituar disa shkolla të qytetit të Pejës.

 Në këto takime Majlinda ka bashkëbiseduar me fëmijë dhe ka treguar për hapat e saj të parë në këtë sport. Ajo gjithashtu ka demonstruar disa “truqe” të xhudos dhe u është përgjigjur pyetjeve të shumta të fëmijëve.

Fëmijët nuk kanë fshehur gëzimin për takimin me kampionen e botës dhe kishin përgatitur shumë surpriza për të. Gëzimin e tyre fëmijët kishin vendosur ta shprehin përmes disa këngëve, poezive dhe një posteri që e mirëpriste kampionen me fjalët KRENOHEMI ME TY.

Ndër të tjera Majlinda falënderoi Albaqeramikën për mundësimin e këtij takimi me nxënxësit anëembanë Kosovës me shpresë që sado pak këto vizita t’i nxisin ata për të punuar në drejtim të ëndrrave të tyre sportive.

Majlinda theksoi se sporti është një nga mënyrat më të mira për zhvillimin e mendjes dhe trupit.

 Një nga synimet e Albaqeramikës në drejtim të kontributit për shoqërinë është edhe afirmimi dhe mbështetja e sportit kosovarë, ku kjo kompani ka përkrahur ekipe dhe sportistë në disa fusha si basketbolli, xhudo, shahu etj.

Poashtu Albaqeramika në vitin e kaluar ka mundësuar vizitën e Majlinda Kelmendit në tri shkolla të Prishtinës, ndërsa sivjet Majlinda do të vizitojë edhe shkollat në qytetet tjera të Kosovës.