Torino, 4 janar - Ylli i skuadrës baske Atletic Bilbao, Fernando Llorente, i cili shkëlqeu në edicionin e kaluar garues, kurse sivjet dha shumë pak, me gjasë shkaku i dëshirës për largim nga Bilbao, definitivisht ka kaluar në skuadrën kampione të shumëfishtë të Italisë, Juventusin e Torinos.

Lajmin e kanë konfirmuar edhe vetë drejtuesit e Juventusit, të cilët kanë thënë se janë në prag të arritjes së marrëveshje për nënshkrimin e kontratës me Fernando Llorenten.

Për të shfrytëzuar shërbimet e tij nga janari i këtij viti, torinezët duhet të paguajnë 4 milionë euro, në të kundërtën duhet ta presin muajin korrik për ta përfituar Llorenten pa para, pasi atij në atë kohë i skadon kontrata me ekipin bask dhe nuk ka nevojë të paguhet fare dëmshpërblimi për të.

E rëndësishme është se Llorente është lojtar i Juventusit ndërsa mbetet të shihet vendimi i torinezëve në ditët në vijim.