Liverpool, 16 korrik - Liverpooli ka konfirmuar se e ka refuzuar ofertën zyrtare të Arsenalit për sulmuesin Luis Suarez.

Kemi raportuar se Arsenali ka bërë ofertë për Luis Suarezin dhe ofertën prej 57 milion funtesh e ka konfirmuar edhe drejtori i Liverpoolit, Ian Ayre, i cili ka thënë se klubi nga Anfield dëshiron ta mbajë uruguaianin.

“Ne kemi marrë një ofertë nga Arsenali. Ne i kemi thënë ‘jo’ asaj oferte, pasi ai po stërvitet dhe është i gatshëm për të luajtur për ne. Ne do të shkojmë përpara në këtë bazë, varësisht nga dëshira e lojtarit. Ai dëshiron të qëndrojë”.

“E kam dëgjuar të ketë thënë se do të kishte dëshirë të luante për Real Madridin apo Arsenalin. Por, ai sigurisht se nuk më ka telefonuar për të më thënë se do të largohet”.

“Tani për tani Luis Suarez është lojtar i Liverpoolit dhe shpresojmë se këto gjëra do të sqarohen shpejt dhe ai do të mund të përqndrohet në aspektet e lojës”, ka deklaruar Ayre.

Besohet se Arsenali nuk do të ndalet me kaq. Mediat angleze raportojnë për një ofertë të re nga klubi nga Emirates, por mbetet të shihet çfarë do të ndodhë në ditët në vijim.