Munich, 10 qershor - Robert Lewandowski nuk do ta ndjek rrugën e Mario Gotzes, për t’iu bashkuar Bayern Munichut gjatë kësaj vere. Për këtë ka siguruar presidenti i Borussia Dortmundit, Hans-Joachim Watzke.

“Lewandowski në verën e vitit 2013 sigurisht nuk do të shkojë në Bayern. Ky është vendimi final. Këtë ia kemi komunikuar edhe Robertit dhe menaxherëve të tij”, ka thënë 52 vjeçari për tabloidin gjerman, Bild.

Kështu, finalisti i Ligës së Kampionëve duket se ka vendosur ta mbajë 24 vjeçarin deri në vitin 2014, kur edhe skadon kontrata e tij.

Sigurisht, Dortmundi verën e ardhshme do ta humb përfaqësuesin polak pa para, ndërsa këtë verë do të mund të përfitonte nga shitja e tij eventuale.

Në rast se qëndron edhe një vit tek ekipi verdh e zi, Lewandowski mund t’i bashkohet pa problem gjigantit bavarez sezonin e ardhshëm, pasi që nuk do të mund ta ndal askush.