Prishtinë, 10 qershor – Në Francë, do të fillojë ngjarja më e madhe aktuale e planetit në futboll, kampionati evropian “Francë 2016”.

Padyshim që e veçanta e kësaj ngjarjeje në raport me ne është pjesëmarrja në të, për herë të parë në historinë e saj, e kombëtares sonë të futbollit.

Sigurimi i kësaj pjesëmarrjeje nuk qe aspak i lehtë dhe ishte rezultat i një shumësie faktorësh si, përkushtimi i futbollistëve tanë, i stafit teknik dhe i tifozëve besnik të saj të cilët e bënë të mundur jetësimin e kësaj ëndrre. Pra, kjo kombëtare është shembulli më i mirë i fuqisë së bashkimit të shqiptarëve nga të gjitha trevat dhe  ky sukses është produkt pikërisht i këtij bashkimi. Lëvizja për Bashkim, ka qenë e palëkundur në qëndrimet e saj se janë pikërisht këta shembuj që do të na dërgojnë drejt sukseseve ndërkombëtare.

Me këtë rast, kujtojmë vitin 2010 kur kemi bërë thirrje dhe kemi organizuar aktivitete për një kombëtare dhe ligë të përbashkët shqiptare.

Shqiptarët, kanë dhënë shembuj të shumtë se janë gjithmonë pranë kombëtares, e njëjta besojmë se do të jetë edhe në Francë. Qoftë drejtpërdrejtë në Francë, ku do të jenë pjesëmarrës një numër i madh i Tifozëve Kuq e Zi, qoftë nga Prishtina, Tirana, Presheva, Kumanova apo Tuzi një është e sigurtë, sytë, zemrat dhe mendjet tona do të jenë të drejtuara drejt saj.

Lëvizja për Bashkim i uron shumë suksese djelmoshave të kombëtares në rrugëtimin historik të finaleve të evropianit.