Londër, 18 shtator - Menaxheri i Arsenalit, Arsene Wenger, ka theksuar se loja e skuadrës së tij ka fituar më tepër opsione pas largimit të kapitenit Robin van Persie.

Holandezi realizoi 30 gola në Premierligë për Arsenalin sezonin e kaluar, duke udhëhequr skuadrën drejt pozitës së tretë pas një nisme të dobët.

Por, ai u shit te rivali Manchester United gjatë afatit kalimtar të verës dhe shumëkush besoi se Arsenali do të vuajë në mungesë të tij.

Por, pavarësisht largimit të 29 vjeçarit, Wenger beson se skuadra ka përzier stilin dhe ka krijuar shpirt më të fuqishëm.

“Nganjëherë një individ zhvillohet dhe bëhet karizma kryesore dhe udhëheqës i ekipit dhe të gjithë e vërejnë vetëm atë. Van Persie shënoi 30 gola dhe kur shënoni 30 gola, të gjithë ua japin topin. Kjo është e thjeshtë. Por, loja jonë tani është më e shpërndarë”, deklaroi Wenger pas fitores 6-1 ndaj Southamptonit të shtunën.

“Ne kemi një shpirt, dëshirë për të luajtur së bashku. Përzierja që vjen është shenjë e një skuadre të vërtetë që kënaqet duke luajtur së bashku. Kjo është bazë e mirë dhe interesante”, u shpreh ai.