Milano, 11 prill - Gjiganti italian, Interi, e ka marrë seriozisht përforcimin e ekipit për këtë verë, pasi ende pa filluar afati kalimtar veror Nerazzurët kanë arritur të sigurojnë firmën e një prej sulmuesve më me perspektivë në botë.

Sky Sport Italia dhe analisti i njohur Gianluca Di Marzio, kanë konfirmuar nga burime të sigurta se Interi ka nënshkruar me futbollistin argjentinas dhe madje edhe me Sampdorian gjithçka ka marrë fund.

Pos tjerash, llogaria zyrtare e Interit në Twitter ia ka bërë ‘follow’ sulmuesit argjentinas. Llogaria zyrtare e Interit i bën ‘follow’ vetëm futbollistëve të ekipit.

Zyrtarizimi i këtij transferimi pritet të bëhet me të përfunduar sezoni.

Mauro Icardi është produkt i akademisë së Barcelonës dhe shihet si një prej sulmuesve me të ardhmen më të ndritur në botë, për shkak të aftësisë së tij për të shënuar gola me kokë dhe goditjeve precize në portë.

Atë e njeh më mirë skuadra e Juventusit, që u mposht në stadiumin e ri nga dy golat e tij teksa Sampdoria kishte disavantazh numerik.