Madrid, 24 nëntor - Lojtari i Tottenhamit, Gareth Bale dëshiron që në fund të këtij edicioni të transferohet te skuadra e Real Madridit, njoftoi gazeta “Daily Mirror”.

Sipas saj, Bale tashmë ka biseduar me drejtuesit e Tottenhamit dhe ka kërkuar nga ata që ta pranojnë ofertën e Realit. Uellsiani është njëri prej futbollistëve të preferuar të trajnerit të Realit Mourinho.

Bale, 23-vjeçar, ka kontratë me skuadrën e Tottenhamit deri në qershorin e vitit 2016.

Mirëpo, skuadra e Tottenhamit tashmë ka vendosur që skuadra e interesuar për Balen duhet të ofrojë një dëmshpërblim prej 60 milionë eurosh, nëse dëshiron shërbimet e tij. Krahas Realit, Bale ka kohë që po monitorohet edhe nga Barcelona.