Napoli, 14 janar - Valon Behrami është shndërruar në objektivin kryesor të Juventusit për këtë afat kalimtar të janarit.

Por, Fiorentina nuk ka ndërmend ta shesë. E përditshmja sportive italiane Tuttosport njoftoi se gjiganti torinez kërkon mesfushorin kosovar, pas vështirësive në arritjen e një marrëveshjeje për transferimin e David Pizarros nga Roma.

Megjithatë, Fiorentina duket se është e përcaktuar ta mbajë Behramin. Drejtori sportiv i klubit toskan, Pantaleo Corvino, jo vetëm që insistoi se kosovari do të qëndrojë në klub, por theksoi se as nuk dëshiron të dëgjojë për oferta të mundshme në drejtim të mitrovicasit.

“Nuk dua as të dëgjoj për oferta për Behramin”, deklaroi Corvino për Fiorentinanews.it, duke bërë të qartë qëndrimin e klubit për 26 vjeçarin.