Madrid, 24 janar - Sulmuesi më i mirë në botë, Radamel Falcao ka prerë përfundimisht shpresat e klubeve më të mëdha evropiane duke deklaruar se nuk ka ndërmend të largohet nga klubi i tij aktual i Atletico Madrid.

Chelsea dhe Reali i Madridit ishin favoritë për të nënshkruar me sulmuesin kolumbian, por shtatlarti ndihet mjaft i lumtur tek skuadra e tij edhe pse nuk përjashton largimit në një të ardhme jo shumë të largët.

“Ndihem si në shtëpi tek Atletico dhe kam ende një kontratë që më duhet ta respektoj,” tha sulmuesi i përfaqësueses kolumbiane ditën e sotme.

“Jam i sigurt që dita do të vijë kur unë të testoj veten në një ligë tjetër futbolli, por momentalisht po mendoj vetëm për skuadrën time. Unë dua që të rritem më tepër këtu dhe të fitoj tituj me këtë skuadër.”

Sulmuesi 26 vjeçar gjithashtu foli paksa edhe për titullin kampion në La Ligën spanjolle duke shtuar se Atletico ka potencialin e duhur për t’ia vështirësuar gjërat Barcelonës kryesuese.

“Objektivi ynë është që të arrijmë një vend në Champions League, por kjo nuk do të thotë së Barcelona është tashmë kampione e këtij sezoni. Ne nuk qëndrojmë shumë larg tyre dhe futbolli ka treguar se mrekullitë mund të ndodhin,” përfundoi Falcao.