Paris, 14 janar - Njëri nga sulmuesit më të mirë në botë për momentin, i zgjedhur edhe si "9" më e mirë për 2012 në mbrëmjen gala të "Topit të Artë", Radamel Falcao, ka lënë të kuptohet se në të ardhmen mund të luajë për Paris Saint Germain.

Kolumbiani ka kontratë me spanjollët e Atletico Madrid deri në vitin 2016, por kërkohet nga klubet më me emër në Europë, të cilat janë gati të bëjnë çmendurira financiare për ta patur në ekip.

"Franca është një vend i bukur. Kam qenë atje dhe më ka pëlqyer shumë. PSG ka një projekt shumë ambicioz sportiv dhe kanë investuar shuma të mëdha parash për të ndërtuar një ekip konkurrues. Do t’u duhet kohë, por mund të arrijnë sukses shumë shpejtë. Nuk është e pamundur që të shihem me ju (gazetarët francezë) shumë shpejtë", ka deklaruar "El Tigre".

Për më shumë, ai ka thurur lavde edhe për sulmuesin suedez të PSG-së, Zlatan Ibrahimoviç, me të cilin do të formonin një dyshe vrasëse nëse kolumbiani do ti bashkohej francezëve.