Manchester, 26 korrik - Manchester United nuk heq dorë nga Ces Fabregas dhe ka arsye për ta bërë këtë.

Sipas “Daily Mail”, mesfushori spanjoll u ka thënë disa miqve të afërt në Angli se dëshira e tij është të transferohet në “Old Traford”.

Oferta e kampionëve të Anglisë është e parezistueshme për faktin e thjeshtë se 26-vjecarit i garantohet fanella e titullarit përkrah ish-shokut të tij të skuadrës tek Arsenali Robin Van Persi.

Për United Fabregas mbetet objektivi kryesor në merkaton e kësaj vere, dhe pavarësisht se Barcelona ka refuzuar dy oferta, klubi anglez nuk heq dorë dhe po përgatit një të tretë.

Vetë trajneri i djajve, David Mojes, deklaroi pak ditë më parë në konferecën e fundit për shtyp se bisedimet për Fabregas vijojnë.

Po sipas “Daily Mail”, United do të ofrojë më shumë se 35 milionë Euro që u refuzuan nga katalanasit. Barcelona në fakt e ka deklaruar të pashitshëm Fabregas, por me ndryshimin e qëndrimit të futbollistit, që kërkon të luajë rregullisht, klubit katalanas nuk i mbetet gjë tjetër veçse ta pranojë ofertën, për ta investuar shumën e përfituar nga shitja e tij për blerjen e lojtarëve të tjerë që kërkon trajneri i sapozgjedhur Gerardo Martino.