Milano, 11 maj - E ardhmja e Masimiliano Alegrit në stolin e Milanit nuk është aspak e sigurt. Nuk ka shërbyer as konfirmimi që vetë presidenti Silvio Berlucsoni i bëri 44- vjeçarit përpara derbit me Interin.

Tekniku toskan e di shumë mirë se një sezon pa trofe në “San Siro” i lëkund shumë pozitat e tij në krye të “djallit”.

 Madje, Berlusconi e ka vënë gjithnjë në dyshim potencialin e Alegrit, i cili më shumë sesa një zgjedhje e kavalierit, ka pasur mbështetjen e Gallianit.

Garancitë që administratori i deleguar ia jepte pasi i shpallte kampion, tani nuk janë më.

Trajnerit të Parmës i është dashur një sezon shumë i mirë për të marrë konfirmimin e presidentit Girardi edhe për vitin tjetër.

Por, Berlusconi nuk e ka fshehur kurrë se ëndrra e tij është që në krye të Milanit trajnerët të vijnë nga ish-familja e Milanit.

 E kush më mirë se ish-mesfushori që mbajti veshur për 12 vite fanellën e 18 herë kampionëve të Italisë, mund ta pranonte me kënaqësi stolin e Milanit. “Të ardhmes nuk i dihet asnjëherë.

E sigurt është vetëm që jam pjesë e Parmës dhe për momentin mendoj vetëm për këtë skuadër”, – u shpreh tekniku 48-vjeçar lidhur me atë çka i rezervon e ardhmja.