Barcelonë, 13 shtator - Andres Iniesta do të mungojë në ndeshjet që Barcelona do të zhvillojë ndaj Getafe në kampionat dhe Spartakut të Moskës në Champions League.

Mesfushori katalanas u kthye i dëmtuar nga Tbilisi ku luajti me Spanjën ndeshjen e parë eleminatore për në Brazil 2014 kundër Gjeorgjisë.

Për Iniestën u diagnostikua një dëmtim i lehtë në kofshën e këmbës së djathtë që do e mbajë larg fushave për 2 javë.

Në këtë mënyrë mesfushorit Cesc Fabregas mund t’i hapen dyert e titullaritetit edhe pse trajneri Tito Vilanova mund të zgjedhë edhe opsionin Song.

Një tjetër mungesë për ndeshjen ndaj Getafe për katalanasit mund të jetë edhe mbrojtësi Jordi Alba.

Spanjolli i krahut të majtë po kalon një proces gripal dhe pjesëmarrja e tij në ndeshjen e radhës do të mësohet vetëm ditën e premte.