Madrid, 5 shkurt - Cristiano Ronaldo mes të shkuarës dhe të tashmes. Bomberi portugez i Realit të Madridit pret me padurim sfidën e Champions League ku do të gjejë si kundërshtar një skuadër speciale.

Manchester United besoi te djaloshi që militonte te Sporting Lisbona, duke e transferuar në Angli ku u rrit si lojtar duke fituar edhe Topin e Artë.

Ronaldo sigurisht që i ka ende në zemër tifozët e “Djajve të Kuq” dhe këtë peshë mund ta ndiejë edhe në përballjen e kthimit.

“Sfida kundër Manchester United? Do të jetë një kënaqësi e madhe të rikthehem si kundërshtar në atë Old Trafford. E dua qytetin e Manchesterit dhe besoj se do të qëndrojë përherë në zemrën time”.

Në vijim, numri 7 nuk pranon të bëjë parashikime, duke theksuar se bëhet fjalë për një sfidë të hapur.

“Nuk mund të them kush do të fitojë sepse bëhet fjalë për dy nga skuadrat më të forta të botës. Kush është më i fortë mes Fergusonit dhe Mourinhos? Të dy janë trajnerë të shkëlqyer. Është njëlloj sikur të krahasosh një Ferrari me një Porche”.

Përballja e parë mes dy gjigandëve të futbollit evropian do rë zhvillohet në datën 13 Shkurt në stadiumin “Santiago Bernabeu”.