Moskë, 16 korrik - Fabio Capello është trajneri i ri i Rusisë. Lajmi konfirmohet nga presidenti i Federatës Ruse të futbollit Nikita Simonjan për agjensine e lajmeve Itar-Tass.

\'Vendosëm që të caktonim Capello-n si trajner të përfaqësueses-tha Simonjan-tani po presim që ai të mbërrijë në Moskë për të përcaktuar edhe detajet e fundit të kontratës përpara se ai ta firmosë atë. Besojmë se gjithcka do të mbyllet përfundimisht të mërkurën ose të enjten\'.

Ish-trajneri i përfaqësueses angleze do të zëvendësoje në pankinën ruse Dik Advokat që u largua nga detyra menjëherë pas përfundimit të Euro 2012.

Për momentin nuk jepet asnjë e dhënë për ofertën e bërë nga Federata ruse, por sipas medias vendase, për Kapelon është përgatitur një kontratë deri në vitin 2018, vit kur Rusia do të organizojë edhe kampionatin botëror të futbollit.

Fabio Capello dha dorëheqjen nga drejtimi i përfaqësueses angleze në muajin shkurt të këtij viti për shkak të cështjes Terry.

Më parë italiani ka drejtuar skuadra të tilla si Milan, Juventus, Roma apo Real Madrid duke fituar 7 tituj kampionë në Serinë A dhe 2 ne Ligen Spanjolle.Capello ka arritur të fitojë edhe një Ligë Kampionesh në vitin 1994 me Milanin