Bernë, 8 janar - Valon Behrami po kalon momentet më të mira të karrierës. Mesfushori kosovar është bërë njëri prej lojtarëve kryesorë të Napolit dhe kjo u pa edhe të dielën mbrëma, ku ai ishte protagonist në fitoren e thellë ndaj Romës me rezultat 4:1.

Përfaqësuesi zviceran e ka gjetur rehatinë në ekipin nga San Paolo dhe synon të vazhdojë me ritëm të njëjtë edhe në të ardhmen.

“Jam mjaft i lumtur në Napoli. Jetoj në një qytet pasionant me njerëz të sinqertë dhe dëshiroj ta jap maksimumin për këtë fanellë”, deklaroi Behrami për Radio Marte pas ndeshjes.

Pas fitores ndaj ekipit Giallorossi, Napoli u ngrit në pozitën e tretë në tabelë, dy pikë më pak se Lazio, e cila është e dyta dhe 7 prapa kryesuesit Juventus.

Ish futbollisti i Fiorentinës shpreson që ekipi napolitan ta sigurojë kualifikimin në Ligën e Kampionëve, për sezonin e ardhshëm.

“Në këtë moment, renditja e tregon të vërtetën. Jemi një skuadër për njërin prej tri vendeve të para, përkundër faktit se i kemi disa pikë minus. Championsi është një objektiv real dhe do të luftojmë me të gjitha forcat”, vijoi futbollisti kosovar, i cili ishte realist, duke thënë se Napoli ende nuk është ekip i gatshëm për të luftuar për titull të kampionit në Serie A.

Në fund, 27 vjeçari foli për ndeshjen me Romën, ku thotë se Napoli luajti me maturi dhe dominoi ndaj kundërshtarit. Kurse, reaguesin e trefishtë Edinson Cavani e krahason me Wayne Rooneyn e Manchester Unitedit.