Munich, 12 gusht - Bayern Munich ka refuzuar ofertën e Milanit për huazimin e sulmuesit të gjigantit bavarez, Claudio Pizarro, ka njoftuar e përditshmja sportive italiane ‘Gazzetta dello Sport’, të dielën.

‘Rossonerët’ kanë shprehur interesim për transferimin e sulmuesit peruan i cili nuk ka statusin e titullarit në ‘Allianz Arena’. Mirëpo, oferta për huazimin e tij në ‘San Siro’ raportohet se është refuzuar nga drejtuesit e Bayern Munichut.

Aktualisht, Pizarro është zëvendësues i sulmuesit kroat Mario Mandzukic dhe duke marrë parasysh se reprezentuesi kroat është duke shënuar gola në vazhdimësi vështirë se do të arrijë të paraqitet në formacionin bazë të ekipit të Pep Guardiolës.

Por, sa i përket largimit në formë huazimi, duket se ky opsion nuk merret në konsideratë nga kampioni i Bundesligës.