Barcelonë, 8 maj - Barcelona ka filluar të mendojë për blerjet e reja për sezonin e ardhshëm edhe pse ai aktual ende nuk është mbyllur përfundimisht.

Synimi i klubit katalanas është që të sjellë në Kamp Nou një qendër mbrojtës dhe futbollisti më i kërkuar është pikërisht Tiago Silva.

Mbrojtësi brazilian prej kohësh ka tërhequr vëmendjen e stafit teknik të Barcelonës, megjithatë Milani deri tani ka rezistuar mjaft mirë.

Zëvendëspresidenti i kuqezinjve, Adriano Galiani gjatë gjithë kësaj kohe ka deklaruar se Tiago Silva nuk është në shitje, megjithatë kjo nuk i pengon aspak drejtuesit e Barcelonës të bëjnë manovrat e tyre.

Sipas medias spanjolle, klubi katalanas ka vendosur të përdorë kartonin e Keita për të arritur te Tiago silva. Mësohet se Barcelona është gati të lejojë mesfushorin malian të shkojë te klubi milanez i cili prej kohësh është vënë në ndjekje të 32 vjecarit. 

Por jo vetëm kaq. Barcelona mund të përdorë edhe faktin që Milani i detyrohet ende për blerjen e Zlatan Ibrahimovic dhe kjo mund të ndihmojë jo pak spanjollët në arritjen e një marrëveshje me Milanin për Tiago Silvën.