Londër, 25 janar - Një ngjarje e rëndë ka tronditur qytetin verior të Newcastle në Angli, teksa sulmuesi i skuadrës së futbollit me po të njëjtin emër që militon në Premier League, është arrestuar.

Nile Ranger dyshohet se ka përdhunuar një vajzë, e cila ka bërë edhe kallëzimin penal për futbollistin. Ngjarja ka ndodhur në orët e vona të ditës së djeshme, por vetëm sot, departamenti i policisë lokale ka konfirmuar arrestimin e Ranger.

Policia e Northumbria-s është duke marrë në pyetje sulmuesin 21 vjeçar lidhur me akuzat ngritura ndaj tij. Ndërkohë një deklaratë zyrtare e organeve policore shkruante lidhur me ngjarjen:

“Ditën e enjte më 24 janar, një grua bëri kallëzim penal ndaj Nile Ranger duke pretenduar se ishte dhunuar seksualisht nga ai në një hotel në lagjen Jesmond. I dyshuari 21 vjeçar është arrestuar vetëm sot në Forest Hall për akuzat e mësipërme.”

Deri tani nuk ka asnjë reagim apo koment nga klubi i futbollit Newcastle United.