Shanghai, 12 dhjetor - Klubi i Superligës Kineze, Shanghai Shenhua, ka deklaruar se ka nënshkruar marrëveshje dyvjeçare me sulmuesin e Chelseat, Nicolas Anelka.

Shenhua, që ka qenë në negociata me Anelkan në disa javët e kaluara, ka konfirmuar sot në faqen zyrtare se 32-vjeçari ka rënë dakort  t`i bashkohet këtij klubi nga janari.

Klubi kinez nuk ka dhënë detaje financiare të kontratës në deklaratë, edhe pse disa media më herët kishin raportuar se francezi do të fitojë rreth 200 mijë paund (235 mijë euro) në javë.

“Nuk mund ta konfirmoj pagën e tij për momentin. Vetëm mund të them se shuma e fundit do të jetë tjetër nga 200 mijë paund në javë”, ka thënë zëdhënësi i klubit.

Transferimi i Anelkas te Shanghai Shenhua është mbase transferimi më i madh në historinë e futbollit kinez.