Madrid, 24 korrik - Me mbërritjen e Carlo Ancelotti-t në krye të Realit të Madridit janë rritur shpresat e Ricardo Kaka për të gjetur një vend bazë në formacion.

Por për këtë, asit brazilian që shkëlqeu dikur tek Milani, sërish nën urdhërat e Ancelotti-t, i duhet të rikthehet në formën e tij më të mirë fizike.

Mediat spanjolle njoftojnë se Ancelotti ka kërkuar qendrimin e Kaka në Madrid dhe për këtë ka paraqitur një plan special për 31-vjeçarin.

Fantazisti nuk ka udhëtuar me skuadrën drejt Lionit, por ka qendruar në Spanjë për t’u stërvitur individualisht.

Objektivi është arritja e kushteve optimale fizike deri në nisjen e kampionatit spanjoll. Kaka, i privuar edhe nga dëmtimet e shumta që kanë shoqëruar aventurën e tij të pakëndëshme në Madrid, ka luajtur vetëm 994 minuta me “Los Blancos” që nga 2009-ta.