Milano, 25 dhjetor - Ndërsa Administratori i Deleguar i Milanit, Adriano Galliani, ndodhet në Brazil për të negociuar shitjen e dyshes braziliane të sulmit Robinho-Pato, mbi merkaton e janarit zëdhënës u shndërrua kapiteni Massimo Ambrosini.

Në një intervistë për \"La Gazzetta dello Sport\", veterani i kuqezinjëve i jep përgjigje pyetjes: Balotelli apo Drogba?

\"Unë mendoj se talenti i lindur nuk mund të mjaftojë. Përsa i përket Balotellit, mendoj se sjellja e gabuar në raste të shumta nuk mund të justifikohet vetëm me moshën\", u shpreh kapiteni i \"Djallit\".

Përsa i përket sulmuesit nga Bregu i Fildishtë, Ambrosini shtoi: \"Gjithmonë më ka pëlqyer shumë. Është një profesionist dhe profesionistët janë gjithmonë të dobishëm dhe të mirëpranuar tek Milani. Ka forcë karakteri, personalitet dhe karizmën e duhur\".

Megjithatë, sipas kapitenit, i fundit i mbijetuar nga një brez i vjetër i artë, Milani e ka realizuar ndërkohë goditjen më të suksesshme të këtij viti.

\"El Sharaawy më ka befasuar shumë, ndonëse e njihja cilësinë e tij. Si më i vjetër, i them që nuk duhet të vetëkënaqet. Është i ri dhe i zgjuar, është e rëndësishme që të mos mësohet të luajë vetëm në funksion të golit, por të përpiqet të përmirësohet në tërësi në lojën e tij\", përfundon Massimo Ambrosini.