Prishtinë, 5 nëntor - Në një komunikatë te përbashkët të Përfaqësuesit Special të BE-së/Shefit të Zyrës së BE-së në Kosovë dhe Shefave të Misioneve të Shteteve Anëtare të BE-së të pranishëm në Kosovë dhe shefit të EULEX-it, raundi i parë i zgjedhjeve komunale të Kosovës vlerësohet i sukseshem.

Në deklaratë thuhet se zgjedhjet lokale që për herë të parë janë mbajtur në të gjitha komunat e Kosovës, në përputhshmëri me ligjin e Kosovës, janë shënuar me një fushatë intensive, proces transparent dhe kanë dëshmuar qartë vendosmërinë e qytetarëve për të përzgjedhur liderët e tyre lokalë.

Pjesëmarrja e përgjithshme nëpër pjesën më të madhe të Kosovës, përfshirë këtu daljen e madhe të votuesve serbë, ka treguar se qytetarët janë të etur për të vendosur dhe për të përmirësuar procesin e zgjedhjeve aty ku ende është e nevojshme.

\"Fakti se Misioni i parë i BE-së për Vëzhgimin e Zgjedhjeve ka vlerësuar se dita e zgjedhjeve ka kaluar “e qete dhe paqësore\" duke e cilësuar tërë procesin zgjedhor si \"një hap pozitiv të demokracisë në Kosovë\" paraqet një element të rëndësishëm në fuqizimin e progresit të Kosovës drejt rrugës evropiane\".

\"Me kënaqësi e kemi vërejtur se me përgatitje të mirë, vullnet politik dhe me vendosmëri, Kosova është në gjendje që të mbajë zgjedhje të lira dhe të drejta. Kjo dëshmon progresin që Kosova po e arrin në reformat e saj\" thuhet në deklaratë.

Në të njëjtën kohë, ata dënojnë ashpër sulmet në tri qendrat e votimit në Mitrovicën Veriore, të cilat penguan qytetarët që të shprehin vullnetin e tyre duke e  penguar procesin zgjedhor atje.

Ky incident sipas tyre nuk mund të ndryshojë perceptimin e suksesit të përgjithshëm të zgjedhjeve. Përpjekjet për të bojkotuar zgjedhjet në veri  të Kosovës do të dështojnë. 

\"Ne përgëzojmë Komisionin Qendror të Zgjedhjeve, OSBE-në, Zyrën e Prokurorit të Shtetit, Policinë e Kosovës, EULEX-in dhe KFOR-in për rolin e tyre specifik për t\'i bërë të mundura këto zgjedhje në gjithë kompleksitetin e tyre\", thuhet në deklaratën e përfaqësuesit dhe ambasadorëve të BE-së. 

Bashkimi Evropian dhe Shtetet Anëtare të BE-së të pranishme në Kosovë shpresojnë se procesi i zgjedhjeve komunale do të përfundoj me një raund të dytë të rregullt në mbarë Kosovën.