Prishtinë, 14 janar -  Kryeministri i Serbisë, Aleksandër Vuçiq, nuk është kursyer nga deklaratat nacionaliste gjatë vizitës në Kosovë.

Pasi e ka përuruar Klinikën Gjinekologjike në Pasjan, para qytetarëve të mbledhur në këtë vend ai ka thënë se Kosova është djep i Serbisë.

“Kosova është djepi i Serbisë. Kosovën nuk do ta harrojmë kurrë. Ne si Qeveri e Serbisë do të angazhohemi vazhdimisht të krijojmë sa më shumë vende pune këtu, sa më shumë mirëqenie për serbët”, ka deklaruar Vuçiqi.

Ai i ka ftuar serbët që për asnjë çmim mos t’i shesin pronat e tyre dhe të lindin sa më shumë fëmijë. Sipas tij, shitja e pronave do të thotë edhe shpërngulje e serbëve nga Kosova.