Berlin 18 janar - Zëvendëskryetari i Partisë Demokratike të Kosovës, Kadri Veseli, sot vazhdoi aktivitetin e tij në vizitën zyrtare që po e zhvillon në Gjermani. Ai mori pjesë në Kuvendin vjetor të CDU-së, në Nordrhrein-Westfalen.

Në këtë Kuvend, zëvendëskryetari i PDK-së, Kadri Veseli u takua me shumë personalite të skenës politike gjermane dhe po ashtu me përfaqësuesë të bizneseve gjermane.

“Ky takim na shërben të gjithë neve që e shohim Gjermaninë si vend mik dhe një aleat të fuqishëm të shtetit tonë. Unë pata takim me figura të rëndësishme të skenës politike dhe të bizneseve gjermane, si dhe i ftova ata që ta vizitojnë dhe të investojnë në Kosovë, ku rinia jonë është e etur për dije dhe kanë një energji të jashtëzakonshme për punë. Mbështetja e Gjermanisë për Kosovën duhet të vazhdohet, ngase perspektiva jonë është kah perëndimi dhe Evropa, një dëshirë e të gjithë qytetarëve të Republikës së Kosovës”, theksoi Veseli.

Veseli takoi edhe Bodo Lottgen, sekretarin gjeneral te NRW CDU-së, ku është biseduar për mbështetjen partiake dhe bashkëpunimin ndërpartiak.

“Ne sot u takuam në Kuvendin vjetor të NRW CDU-së dhe unë i dëshiroj Partisë Demokratike të Kosovës shumë suksese, çdo të mirë dhe një të ardhme të suksesshme në skenën politike. Me një përpjekje edhe më të madhe ju do të arrini sukses dhe kjo është ajo që ju dëshiroj”, u shpreh Lottgen.

Veseli do të vazhdoj edhe me takime tjera, me zyrtarë të partisë më të madhe gjermane, CDU, duke krijuar ura lidhëse në mes Partisë Demokratike të Kosovës dhe CDU-së.