Prishtinë, 11 shtator - Zëvendëskryetari i PDK’së, Kade Veseli, e ka përshëndetur marrëveshjen e arritur mes partive opozitare dhe njëkohësisht ka thënë se është e frikshme se si një parti politike siç është Vetëvendosje ndërron parimet.

“Është e frikshme loja e Parimeve që vjen prej subjektit të VV-së, e cila nga parimi i vetëvendosjes, nëpërmjet së cilës strategji i ka marrë edhe votat, kalon te parimi i negociatave. Çfarë mund të pritet nesër prej këtij subjekti politik kur të udhëheqë dialogun, fjala vjen, në qoftë se VV-ja e mohon ekzistencën e vetvetes në emër të një pushteti politik”, ka shkruar Veseli.

Ai ka thene se akti i marrëveshjes së djeshme është një veprim që dëshmon se në vend është duke u qartësuar formimi i një grupimi të vetëm politik, i cili do të ishte në gjendje t’i konkurrojë partisë më të madhe në vend, siç është, Partisë Demokratike të Kosovës.


“Në parim i përshëndes dhe i përgëzoj katër subjektet politike parlamentare, Lidhjen Demokratike të Kosovës, Vetëvendosjen, Aleancën për Ardhmërinë e Kosovës dhe Nisma-n (VLAN), për arritjen e një marrëveshjeje politike”, ka thënë Veseli që në fillim të komenteve të bëra mbi këtë marrëveshje.

“Megjithatë, që në fillim, më duhet të shpreh konsideratën e grupimit më të ri politik VLAN në raport me qëndrimin, sjelljen dhe veprimin e tyre ndaj zgjedhjeve nacionale të 8 qershorit, prej të cilave, të gjitha subjektet brenda grupimit më të ri VLAN, dolën të humbura, ashtu siç patën garuar në ato zgjedhje”.

“Mirëpo, përkundër uratave dhe përgëzimeve të shprehura për arritjen e Marrëveshjes politike ndërmjet grupimit më të ri politik VLAN, për hir të së vërtetës, më duhet të qartësohemi se synimi suprem i këtij grupimi në raport me fjalën e sovranit, në thelb, reflekton pozicionime të frikshme që dëmton jo vetëm themelet demokratike të Republikës, por i vë në mëdyshje edhe marrëdhëniet e saj me partnerët tanë ndërkombëtar në krye me Shtetet e Bashkuara të Amerikës”, ka thënë ndër të tjera Veseli, duke radhitur arsyet pse është i frikshëm pozicioni i këtyre katër partive.

Më poshtë lexojeni të plotë vlerësimin e zëvendëskryetarit të PDK-së, Kadri Veseli rreth “Marrëveshjes VLAN”, dërguar mediave:

“Marrëveshja” e 10 Shtatorit

Akti i marrëveshjes së djeshme është një veprim që dëshmon se në vend është duke u qartësuar formimi i një grupimi të vetëm politik, i cili do të ishte në gjendje t’i konkurrojë partisë më të madhe në vend, siç është, Partisë Demokratike të Kosovës.

Në parim i përshëndes dhe i përgëzoj katër subjektet politike parlamentare, Lidhjen Demokratike të Kosovës, Vetëvendosjen, Aleancën për Ardhmërinë e Kosovës dhe Nisma-n (VLAN), për arritjen e një marrëveshjeje politike.

Përgëzimi dhe respekti u dedikohet krerëve dhe ekipeve të këtyre subjekteve politike parlamentare, pa gjykuar fillimisht mbi marrëveshjen, sepse, konsideroj se vet akti i marrëveshjes është një veprim që dëshmon se në vend është duke u qartësuar formimi i një grupimi të vetëm politik, i cili do të ishte në gjendje t’i konkurrojë partisë më të madhe në vend, siç është, Partisë Demokratike të Kosovës.

Megjithatë, që në fillim, më duhet të shpreh konsideratën e grupimit më të ri politik VLAN në raport me qëndrimin, sjelljen dhe veprimin e tyre ndaj zgjedhjeve nacionale të 8 qershorit, prej të cilave, të gjitha subjektet brenda grupimit më të ri VLAN, dolën të humbura, ashtu siç patën garuar në ato zgjedhje.

Dhe, kur jemi të zgjedhjet e mbajtura të 8 qershorit, të cilat i fitoi koalicioni i drejtuar prej Partisë Demokratike të Kosovës, Shtetet e Bashkuara të Amerikës dhe Bashkimi Evropian, i pati vlerësuar këto zgjedhje, së bashkë me dialogun, si dy të arriturat më të mëdha të viteve të fundit në Kosovë.

Mirëpo, përkundër uratave dhe përgëzimeve të shprehura për arritjen e Marrëveshjes politike ndërmjet grupimit më të ri politik VLAN, për hir të së vërtetës, më duhet të qartësohemi se synimi suprem i këtij grupimi në raport me fjalën e sovranit, në thelb, reflekton pozicionime të frikshme që dëmton jo vetëm themelet demokratike të Republikës, por i vë në mëdyshje edhe marrëdhëniet e saj me partnerët tanë ndërkombëtar në krye me Shtetet e Bashkuara të Amerikës, sepse:

E para, mosreflektimi i VLAN-it, ndaj vendimeve të Gjykatës Kushtetuese si dhe ndaj shkeljes së Kushtetutës së Republikës, është akt i skajshëm i papërgjegjësisë ndaj lirisë, rendit dhe ligjit, ndaj demokracisë dhe perspektivës euroatlantike të Republikës;

E dyta, marrëveshja e grupimit më të ri politik VLAN, a priori, po i zhvleftëson vendimet e Gjykatës Kushtetuese, po e shkel Kushtetutën dhe kushtetutshmërinë e Republikës, nëpërmjet së cilës është saktësuar qartë se partia apo koalicioni fitues i garës zgjedhore e zgjedh kryeparlamentarin (nëpërmjet propozimit) dh askush tjetër;

E treta, marrëveshja e grupimit politik VLAN krejt hapur po tenton të krijojë precedent, për të mohuar vullnetin e qytetarëve, rendin dhe garën demokratike zgjedhore të Republikës;

E katërta, përpjekjet e kryetarit të LDK për ta ‘fshehur’ thelbin e marrëveshjes së VLAN-it, sa i përket dialogut, janë shqetësuese;

E pesta, është e frikshme loja e Parimeve që vjen prej subjektit të VV-së, e cila nga parimi i vetëvendosjes, nëpërmjet së cilës strategji i ka marrë edhe votat, kalon te parimi i negociatave. Çfarë mund të pritet nesër prej këtij subjekti politik kur të udhëheqë dialogun, fjala vjen, në qoftë se VV-ja e mohon ekzistencën e vetvetes në emër të një pushteti politik;

E gjashta, si është e mundur të qeveriset nesër vendi me një kryeministër prej partisë së katërt parlamentare, për të cilin vetë LDK-ja pohon botërisht se do të qeverisë në të vërtetë LDK-ja e kryeministri prej partisë së katërt parlamentare – AAK, është vetëm formal;

E shtata, Republika e Kosovës është shtet me përgjegjësi të vlerave dhe investimeve të përbashkëta me faktorin euroatlantik, në anën tjetër, pothuaj gjysmën e subjekteve brenda VLAN-it, nuk janë duke e pritur (pranuar), as Shtetet e Bashkuara të Amerikës e as Bashkimi Evropian; a nuk është duke e kërcënuar VLAN-i hapur arritjen e madhe të qytetërimit Perëndimor brenda Republikës së Kosovës;

E teta, grupimi i ri politik VLAN, me veprimin e tyre politik të papërgjegjshëm, është duke e sfiduar, jo vetëm kushtetutshmërinë dhe Kushtetutën, institucionet e shtetit, demokracinë, por është duke krijuar hapur frikë, jostabilitet e anarki te qytetarët e Republikës dhe në raport me vendet fqinje, rajonale e më gjerë dhe

E nënta, VLAN-i është dashur para zgjedhjeve të bëjë koalicione të tillë për ta siguruar fitoren në garën demokratike që po e kërkon me aq përkushtim; ata, me dashje apo pa të, kanë ngatërruar jo vetëm abc-në e demokracisë dhe procedurat e saj, por ata kanë ngatërruar edhe kohën e rendit dhe të garës demokratike njëkohësisht.

Prishtinë, 11.9.2014

Kadri Veseli,
Zëvendëskryetar i PDK-së