Prishtinë, 1 prill - Zëvendëskryeministri dhe Ministri i Jashtëm i Republikës së Kosovës Hashim Thaçi, ka takuar delegacionin e Grupit të Miqësisë Kosovë-Francë në Asamblenë Nacionale të Republikës së Francës i cili gjendet për vizitë disa ditore në vendin tonë.

\"U shpreha mirënjohjen për ndihmën e pakursyer që na ka dhënë Franca në shumë sfera e në proceset më të rëndësishme të vendit tonë dhe mora prej tyre rikonfirmimin se kjo mbështetjë do vazhdojë në mënyrë intensive edhe në të ardhmen. Mysafirët më siguruan gjithashtu që do angazhohen me përkushtim në mbështetjen e përpjekjeve të Kosovës për të arritur Marrëveshjen e Stabilizim Asociimit, liberalizimin e vizave dhe Partneritetin për Paqe në NATO\", ka shkruar ai në Facebook.

Ai ka deklaruar se me mysafirët ka  diskutuar edhe nevojën për ta shtrirë më shumë bashkëpunimin tonë dypalësh në fushën e ekonomisë duke përmendur rastin e suksesshëm të projektit të investimit francez në Brezovicë dhe duke biseduar se çfarë veprimesh të tjera mund të ndërmerren që ky rast të pasohet nga të tjerë investitorë seriozë francez.