Prishtinë, 3 shkurt - Kryeministri i Republikës së Kosovës Hashim Thaçi, ka kërkuar që situata e krijuar në Universitetin e Prishtinës, të zgjidhet sa më shpejt.

"Menjëherë pas kthimit prej Konferencës së Mynihut për Sigurinë, thirra ministrin e arsimit, Z. Ramë Buja për të raportuar mbi situatën e krijuar në Universitetin e Prishtinës", ka shkruar ai në facebook.

Ai duke respektuar autonominë e Universitetit të Prishtinës u ka bërë thirrje organeve përkatëse të universitetit që të dëshmojnë nivel të lartë përgjegjësie, dhe, në bazë të statutit të Universitetit të Prishtinës si dhe legjislacionit në fuqi për arsimin e lartë, të angazhohen për ta zgjidhur këtë situatë.