Thaçi kërkon të ruhet dinamika e dialogut
Zëvendëskryeministri Thaçi e falënderoi Zëvendës-asistentin Yee për mbështetjen e vazhdueshme që SHBA jep për Kosovën, me theks të veçantë në mbështetjen në raundin e fundit të bisedimeve mes Kosovës e Serbisë në të cilën u arrit marrëveshja për gjyqësorin.
Zëvendëskryeministri Thaçi theksoi se për të mirën e procesit është mirë që të bëhet implementimi i plotë i marrëveshjeve të arritura deri tani.
Ai e njoftoi mysafirin edhe për themelimin e qeverisë së re, prioritetet e qeverisë dhe sfidat me të cilat është e gatshme të përballet qeveria, pasi ka stabilitet dhe fuqi politike.
Gjithashtu, zëvendëskryeministri Thaçi kërkoi mbështetjen e SHBA-së edhe për projektet e Kosovës, që këtë vit të aplikojë për anëtarësim në Këshillin e Evropës dhe në programin e Partneritetit për Paqe.
Zëvendës-asistenti Yee e përgëzoi zëvendëskryeministrin Thaçi për marrëveshjen për drejtësinë të arritur në raundin e fundit të bisedimeve mes Kosovës e Serbisë dhe e inkurajoi që të vazhdohet me dialogun dhe që palët të qëndrojnë konstruktive në këtë proces.
Në çështjen e dialogut, të dyja palët u pajtuan se duhet të ruhet dinamika e deritashme dhe për këtë duhet të hapen temat që janë afër të përmbyllen.
