Prishtinë, 25 mars - Kryeministri i Kosovës, Hashim Thaçi përmes një shkrese zyrtare drejtuar Kuvendit të Kosovës ka shprehur gatishmërinë për t’i informuar deputetët lidhur me takimin e fundit në Bruksel me kryeministrin e Serbisë, Ivica Dacic.

Në kumtesën për media thuhet se në pajtim me Kushtetutën e Republikës së Kosovës, me Rregulloren për fushat e përgjegjësisë administrative të Zyrës së Kryeministrit dhe ministrive dhe në përputhje me Rezolutën e Kuvendit për normalizimin e marrëdhënieve mes Republikës së Kosovës dhe Serbisë, Kryeministri i Republikës së Kosovës, Hashim Thaçi përmes një shkrese zyrtare dërguar Kryetarit të Kuvendit të Republikës së Kosovës, Jakup Krasniqi, ka shprehur gatishmërinë për t’i informuar deputetët e Kuvendit të Republikës së Kosovës për takimin e shtatë të zhvilluar në Bruksel mes Kryeministrit të Republikës së Kosovës dhe Kryeministrit të Serbisë.