Prishtinë, 13 mars - Kryeministri i Kosovës, Hashim Thaçi, në mbledhjen e kabinetit qeveritar ka thënë se Prishtina ka qëndrimet e veta dhe nuk kanë ndryshuar nga ato të mëparshmet, në dialogun që është duke u zhvilluar për normalizimin e marrëdhënieve mes Kosovës dhe Serbisë.

Ai njoftoi se sot ka zhvilluar një bisedë telefonike me zyrtarin amerikan, Philip Reeker, i cili, sipas tij, ka dhënë mbështetjen e vazhdueshme të Shteteve të Bashkuara të Amerikës për tërë procesin që po zhvillohet.

Thaçi duke folur për vizitën e Baroneshës, Catherine Ashton në Kosovë, e ka quajtur një vizitë inkurajuese që do të mund të shtynte implementimin e marrëveshjeve të arritura nga ky dialog.

Shefi i ekzekutivit të  Kosovës, ka thënë se procesi është në fazën e rëndësishme përfundimtare të marrëveshjeve në mes shtetit të Kosovës dhe Serbisë.

Ai ka bërë të ditur se sonte në mbrëmje dhe nesër,  Ashton do të qëndrojë  në Republikën e Kosovës, ku është planifikuar që të ketë takime me  krerët e institucioneve të Kosovës dhe me një pjesë të liderëve politik.

“Sa i përket Prishtinës gjithçka është e qartë, qëndrimet tona do të jenë në përputhshmëri me Kushtetutën, ligjet e Kosovës dhe standardeve evropiane.”

“Përkushtimi i ynë maksimal është normalizimi i gjendjes në veri, fillimi i funksionimit të jetës normale, shpërbërja e plotë e gjitha strukturave të sigurisë, krijimi i kushteve dhe hapësira të përshtatshme për lëvizje të lirë të Republikës së Kosovës.”

“Fillimi i funksionimit të sistemit të drejtësisë, sipas legjislacionit kosovar, në të njëjtën kohë krijimin e kushteve për organizimin e zgjedhjeve të lira edhe në katër komunat e tjera, kur do të organizohen zgjedhjet e përbashkëta në gjithë Kosovën në nivel lokal”, ka theksuar kryeministri Thaçi.