Prishtinë, 9 shkurt - Ambasadori i Republikës së Kosovës në Gjermani, Skender Xhakaliu, i ka dorëzuar letrat kredenciale si ambasador jo-rezident i Kosovës në Mbretërinë e Danimarkës.

Në një audiencë solemne, ambasadori Xhakaliu i dorëzoi letrat kredenciale te mbretëresha Margrethe II.

Ambasadori Xhakaliu shprehu falënderimet dhe mirënjohjen e popullit dhe Qeverisë së Republikës së Kosovës për ndihmën që Mbretëria e Danimarkës ka dhënë për Kosovën, si dhe dëshirën për forcimin e mëtutjeshme të marrëdhënieve shumë të mira ndërmjet dy vendeve.

Me aktin e dorëzimit të letrave kredenciale te mbretëresha Margrethe II, Ambasada e Republikës së Kosovës në Gjermani e mbulon Mbretërinë e Danimarkës si mision diplomatik jo-rezident, i akredituar në Kopenhagë.