Shumica parlamentare po e rrezikon funksionalitetin e Kuvendit
KDI konsideron se rastet e bojkotit të seancave plenare nga subjektet politike shumicë që udhëheqin me vendin, janë bërë shprehi e shpeshtë në praktikën tonë parlamentare përkundër që ato janë panjohura për praktikat parlamentare të vendeve demokratike.
KDI vlerëson se me bojkotin e shumicës parlamentare të seancës plenare të datës 03 tetor 2013 dhe seancës së sotme plenare, objektivisht Kuvendi i Kosovës po vihet jashtë funksionimit dhe kjo i cenon jo vetëm agjendat parlamentare në një demokraci por edhe sistemin politik dhe rendin kushtetues në vend.
Qasja e tillë po pengon implementimin e mandatit kushtetues të Kuvendit, ku vetëm në agjendën e sotme kishte për miratim katër Projektligje si dhe kompletimin e organeve udhëheqëse të institucioneve të pavarura shumë të rëndësishme si AKP (Agjensioni Kosovar i Privatizimit dhe OSHP (Organi Shqyrtues i Prokurimit).
Andaj nisur këto fakte, KDI kërkon që qasja e tillë sabotuese dhe bllokuese nga ana e partive politike që përbëjnë shumicën parlamentare, duhet të ndërpritet me qëllim që institucionit më të lartë përfaqësues në vend, ti kthehet normaliteti në implementimin e mandatit kushtetues që ka.
