Prishtinë, 22 mars - Kryetari i Kuvendit të Republikës së Kosovës, dr. Jakup Krasniqi, priti sot delegacionin e parlamentarëve italianë të Asamblesë së OSBE-së, të kryesuar nga Riccardo Migliori, president i delegacionit italian në Asamblenë Parlamentare të OSBE-së dhe zëvendëspresident i Asamblesë Parlamentare të OSBE-së.

Me këtë rast delegacioni falënderoi kryetarin për pritjen e ngrohtë, duke i përcjellë njëkohësisht kryekuvendarit edhe përshëndetjet e homologut italian Gjanfranko Fini.

Anëtarët e delegacionit treguan interesim që marrëdhëniet ndërmjet Parlamentit të Italisë dhe Kuvendit të Kosovës  të intensifikohen, duke u angazhuar edhe për formimin e grupit të miqësisë në mes dy parlamenteve.

Delegacioni italian theksoi se është duke shqyrtuar modalitetet  që Kosova të jetë pjesë e Asamblesë Parlamentare të OSBE-së.

Në këtë frymë u shtrua nevoja që Komisioni për Punë të Jashtme i Kuvendit të Kosovës të krijojë një grup  pune për vendosjen e marrëdhënieve të vazhdueshme me OSBE-në, me qëllim të intensifikimit të marrëdhënieve ndërmjet  OSBE-së dhe Kuvendit të Kosovës.

Në vijim delegacioni italian diskutoi edhe  për çështjen e zgjedhjeve parlamentare të Serbisë edhe në Kosovë, të cilat do të mbaheshin nën mbikëqyrjen e OSBE-së.

Kryekuvendari Krasniqi falënderoi delegacionin për këtë vizitë që po i bën Kosovës, si dhe për bashkëpunimin  ndërmjet Parlamentit të Italisë dhe Kuvendit të Kosovës, por edhe ndërmjet institucioneve të tjera të të dy vendeve.

Në fjalën e tij, kryekuvendari Krasniqi theksoi se Kosova vazhdimisht ka bërë kompromise që nga Rambujeja  e deri në bisedimet e Brukselit, ndërkaq, Serbia nuk ka treguar  gatishmëri  për implementimin e  marrëveshjeve të arritura.

Kreu i legjislativit të vendit ngriti pastaj çështjen e të zhdukurve, e cila ende është e pazgjidhur, pasi Serbia nuk po bën asgjë në këtë drejtim.

Ndërkaq, duke i bërë një vështrim zhvillimit ekonomik të Kosovës, ai tha: ”Ekonomia që sot kemi në Kosovë është edhe si pasojë   shfrytëzimit, por edhe shkatërrimit të saj nga Serbia gjatë luftës”.

Në vazhdim kryekuvendari Krasniqi tha:”Serbia ka bërë ndërhyrje të rëndë në veri të Kosovës, ndërsa zgjedhjet serbe çfarëdo qofshin ato, lokale ose parlamentare, janë të papranueshme për Kosovën”.

Kryetari i Kuvendit Krasniqi kërkoi që  parlamentarët italianë të ndikojnë, që Kosova të jetë pjesë e Asamblesë Parlamentare  të OSBE-së.

Gjithashtu, Krasniqi  tha se shumë shpejt do të formohet Grupi i Miqësisë Kosovë-Itali.