Prishtinë, 3 shkurt - Deputeti i Kuvendit të Kosovës nga radhët e Lëvizjes Vetëvendosje!, Rexhep Selimi, e ka kritikuar qeverinë se nuk po vepron kundër interesave të Serbisë në Kosovë.

Në këtë intervistë dhënë për gazetën “Epoka e re”, Selimi ka theksuar se kjo qeveri dhe kryeministri Mustafa asnjëherë deri më tani nuk ka vënë përballë Serbisë as muskujt e as ligjin.

Ai ka thënë se përballë Serbisë kërcënuese dhe agresore, udhëheqësit e shtetit të Kosovës po sillen në mënyrë nënshtruese.

Selimi ka thënë se Kosova e ka vetëm qeverinë dhe presidentin të dobët dhe të nënshtruar ndaj Serbisë. “Kosova dhe shqiptarët nuk kanë frikë as nga Serbia e as nga kërcënimet e saj”, është shprehur Selimi.

Ai ka bërë thirrje të fillojnë procedurat e formimit të Forcave të Armatosura, pavarësisht prej kundërshtimeve të Serbisë.

“Serbia është arsyeja kryesore se përse ne duhet të kemi ushtri të fortë dhe të përgatitur mirë”, ka thënë Selimi.