Prishtinë, 12 maj - Ish-shefi i shtabit të përgjithshëm të FSK-së, Sylejman Selimi, aktualisht ambasador i Kosovës në Tiranë do ti bashkëngjitet radhëve të Partisë Demokratike të Kosovës (PDK).

Lajmi bëhet i ditur nga e përditshmja “Tribuna Shqiptare” në Prishtinë, e cila thekson se në kuadër të rigrupimeve të reja në PDK, pritet edhe ardhja e Selimit, por edhe dy ish-përfaqësuesve të lartë të UÇK-së, Kadri Veseli, i njohur si ish-shefi i SHIK-ut si dhe Agim Çeku, aktualisht kryetar i Partisë Socialdemokrate të Kosovës.

Zëdhënësi i PDK-së, Blerand Stavileci ka theksuar se organet partiake së shpejti do të vendosin lidhur me mbajtjen e Kuvendit zgjedhor partiak.

Sipas tij, pas tre muajve sigurisht do të mbahen zgjedhjet e reja brenda PDK dhe prurje të reja nga sfera politike dhe shoqërore në kuadër të këtij subjekti.